ស្ថាប័ន និមួយៗមានបែបបទនៃការដឹកនាំមិនដូចគ្នាទេ តែទោះជាយ៉ាងណា គ្រប់បែបបទនៃការដឹកនាំទាំងអស់សុទ្ធតែមានបំណងដើម្បីធ្វើអោយ ស្ថាប័ននោះទទួលបានជោគជ័យនូវគោលដៅដែលបានកំណត់។ជាទូទៅបែបបទនៃការ ដឹកនាំចែកចេញជា ៤ ប្រភេទ គឺ៖
១. ការដឹកនាំតាមបែបប្រើអំណាច
គឺជាការគ្រប់គ្រង និងចាត់ចែងការងារដោយឈរលើមូលដ្ឋាន នៃការប្រើប្រាស់ សិទ្ធិ តួនាទីនិងអំណាចរបស់ខ្លួន។ការដឹកនាំបែបអំណាចបង្ហាញលក្ខណៈសំគាល់ ដូចខាងក្រោម៖
-គាបសង្កត់បុគ្គលិកក្នុងការបញ្ចេញយោបល់ និងការសម្រេចចិត្តក្នុងការងារ។
-ការណែនាំធ្វើឡើងតាមបែបបង្គាប់បញ្ជាដល់បុគ្គលិកឲ្យធ្វើតាមការកំណត់របស់ខ្លួន។
-ការសម្រេចចិត្តធ្វើឡើងដោយអត្តនោម័តិ ពុំមានការចូលរួមពិគ្រោះយោបល់។
-ប្រើប្រាស់ទណ្ឌកម្ម ឬស្ដីបន្ទោសចំពោះកំហុសឆ្គងជាជាងស្វែងរកដំណោះស្រាយ។
-យកចិត្តទុកដាក់លើការងារនិងលទ្ធផល ជាជាងសេចក្ដីត្រូវការរបស់បុគ្គលិក។
២. ការដឹកនាំតាមបែបជាប្រព័ន្ធ
គឺជារបៀបចាត់ចែង និងគ្រប់គ្រងដែលឈរលើមូលដ្ឋាននៃរចនាសម័្ពន្ធគ្រប់គ្រង រួមទាំងគោលការណ៍របស់ស្ថាប័ន ក្នុងការបំពេញការងារ និងតួនាទីរបស់ខ្លួន។ការដឹកនាំជាប្រព័ន្ធមានលក្ខណៈដូចខាងក្រោម៖
-មានបែបបទការងារ ដូចជាបទបញ្ជាផ្ទៃក្នុង ផែនការការងារ និងគោលការណ៍ណែនាំ។
-ធ្វើការសម្រេចចិត្ត គឺផ្អែកលើមូលដ្ឋានច្បាប់ និងគោលការណ៍ណែនាំ។
-ប្រាស្រ័យទាក់ទង ផ្ដោតសំខាន់ទៅលើការប្រើប្រាស់លិខិតស្នាមជាលាយលក្ខណ៍អក្សរ។
-ផ្ដល់យោបល់និងសម្រេចចិត្ត ធ្វើឡើងជាផ្លូវការ តាមរយៈកិច្ចប្រជុំ ឬលាយលក្ខណ៍អក្សរ។
៣. ការដឹកនាំតាមបែបជាក្រុម
គឺជាការចាត់ចែងនិងគ្រប់គ្រងដែលឈរលើទស្សនៈរបស់ក្រុមនិងការ សម្រេចចិត្តដោយមានការចូលរួមគ្នា។ការដឹកនាំតាមបែបជាក្រុមមាន លក្ខណៈសម្គាល់ដូចខាងក្រោម៖
-ឲ្យតម្លៃលើការងារជាក្រុម និងទទួលស្គាល់លទ្ធផលការងារថាជាលទ្ធផលរបស់ក្រុម បង្កើតទំនាក់ទំនងក្នុងក្រុមបានប្រសើរ។
-មានការប្រជុំពិគ្រោះយោបល់ជាមួយបុគ្គលិក និងជួយតម្រង់ទិសអនុវត្តន៍ដល់បុគ្គលិក។
-ចាត់ទុករាល់កំហុសឆ្គងថាជាកំហុសរបស់ក្រុម និងមានស្មារតីការងារជាក្រុម ដោយលើកទឹកចិត្ត ផ្ដល់ឱកាស ឲ្យសមាជិកចូលរួមបញ្ចេញយោបល់និងការសម្រេចចិត្ត។
៤. ការដឹកនាំតាមបែបស្មើភាព
គឺជាការចាត់ចែងនិងគ្រប់គ្រងដោយឈរលើមូលដ្ឋានស្មើភាពគ្នារវាង អ្នកដឹកនាំនិងបុគ្គលិក ហើយផ្ដល់សិទ្ធិពេញលេញដល់បុគ្គលិកក្នុងការធ្វើសេចក្ដីសម្រេច ចិត្ត ដើម្បីបំពេញការងារទៅតាមមុខងារ ឋានៈ តួនាទីរបស់ខ្លួន។
ប្រភព http://cambodia.mx
